పెద్దాపురం రంగారావు (Peddapuram Rangarao)

పాలమూరు జిల్లా రచయిలలో పేరుపొందిన మొల్గర రంగారావు ఉప్పునూతల మండలం పెద్దాపురం గ్రామానికి చెందినవారు. అసలు ఇంటిపేరు మొల్గర అయిననూ స్వగ్రామం పెద్దాపురంతోనే ప్రసిద్ధి చెందిన రంగారావు ఆగస్టు 30, 1915న జన్మించారు. జిల్లాలో ప్రముఖ విద్యావేత్తగా, కవిగా పేరుపొందారు, స్థానిక విద్యాభ్యాసం తెల్కపల్లి, నాగర్‌కర్నూల్‌లలో కొనసాగించి, ఉన్నత విద్యా ఉస్మానియా విశ్వవిద్యాలయం నుంచి పూర్తిచేశారు. ప్రారంభంలో ఉస్మానియా విశ్వవిద్యాలయంలోనే ఉద్యోగం చేస్తూ అక్కడి అధికారుల నిరంకుశధోరణి నచ్చక రాజీనామా చేసి రెవెన్యూ శాఖలో ప్రవేశించారు. 30 సంవత్సరాల వయస్సులో ఉన్నప్పుడు భార్య మరణించడంతో (అప్పుడు ఆమెకు 23 సం.లు) క్రుంగిపోయి, జీవితంపై విరక్తి చెంది స్వగ్రామం పెద్దాపురం సమీపంలో పర్ణశాల ఏర్పాటుచేసుకొని అధ్యాత్మిక జీవితం ప్రారంభించారు. ఆ సమయంలోఅనేక తార్కిక, అధ్యాత్మిక గ్రంథాలను పఠించారు. మరికొంత కాలానికి ఉపాధ్యాయులుగా ఉద్యోగం చేపట్టి విద్యాశాఖాధికారి హోదాకూడా పొందారు. ఆ సమయంలో ఈయన మంచిపేరు సంపాదించారు. జిల్లాలో ప్రముఖ విద్యావేత్తగా కీర్తి పొందారు. 1973లో ఉద్యోగవిరమణ చేశారు. అనేక సామాజిక కార్యక్రమాలలోపాల్గొనడమే కాకుండా అనేక రచనలు చేసి కవిగానూ పేరుపొందారు. శ్రీరాజరాజేశ్వర శతకము, నృసింహశతకము, ఉమామహేశ్వర శతకము వంటి అనేక రచనలు చేశారు. మామిళ్ళపల్లి శ్రీలక్ష్మీనరసింహస్వామి ఆలయానికి 1992 నుంచి మరణించే వరకు అధ్యక్షులుగా వ్యవహరించారు. అక్టోబరు 24, 1993న రంగారావు మరణించారు. విభాగాలు: పాలమూరు జిల్లా రచయితలు,  ఉప్పునూతల మండలము, 1915లో జన్మించినవారు, 1993లో మరణించినవారు,